Ny støtteordning skal hjelpe lokale bedrifter å bli Miljøfyrtårn-sertifisert
Sparebanken DIN Telemark lanserer no ei eiga støtteordning for verksemder som vil bli Miljøfyrtårn-sertifisert. På frokostmøtet i samarbeid med Telemark Næringshage får du vite meir – både om støtteordninga, ulike sertifiseringsløp og ein lokal gladnyheit for næringslivet i Seljord.
– Vi ser at fleire bedrifter ønskjer å ta grep, men at økonomi ofte er eit hinder. Difor har vi no oppretta ei støtteordning for miljøsertifisering, fortel Vegard Hauk Bjerkeli, leiar for bedriftsmarknad i Sparebanken DIN Telemark.
– På frokostmøtet vil vi vise korleis ordninga fungerer – og korleis bedrifter i regionen konkret kan søke.
Saman med banken stiller òg Telemark Næringshage. Miljøfyrtårnkonsulent Ida Kasin Frøislie vil gi deltakarane ei innføring i kva det inneber å bli miljøsertifisert, og korleis ein kan gå fram – anten åleine eller saman med andre.
– Vi ser at fleire ønskjer å jobbe strukturert med miljø og berekraft, men manglar oversikt over kva som krevst. Eg kjem til å fortelje om sertifiseringsløpa, kva støtte som finst, og korleis Miljøfyrtårn-sertifisering òg kan hjelpe i møte med dei nye krava frå EU, seier Frøislie.
– Og ikkje minst har vi ei gladnyheit til næringslivet i Seljord, som eg skal dele på møtet – eit nytt lokalt initiativ som skal gje fleire eit puff i riktig retning.
Frokostmøtet er gratis og ope for alle næringsdrivande.
Tysdag 10. juni i Seljord. Brøløsvegen 51.
Klokka 08.00 – 09.00